दैनिक आनंद News (प्रतिनिधी)
कोण होणार नगराध्यक्ष ? उत्सुकता शिगेला तीन जागांसाठी शांततेत मतदान
संगमनेर: संगमनेरयेथील १५ प्रभागांतील २७ नगरसेवकपदांसह नगराध्यक्षपदासाठीची मतदान प्रक्रिया पार पडली आहे.नगरसेवकपदाच्या ३ जागांसाठी आज मतदान झाले. अत्यंत चुरशीच्या झालेल्या निवडणुकीत नगरसेवकपदापेक्षा नगराध्यक्षपदाची माळ कोणाच्या गळ्यात पडते, याकडे संगमनेरकरांचे लक्ष लागून आहे.
यामध्ये मुस्लिमबहुल भागात सर्वाधिक मतदान झाले आहे. मतदानाचा हा टक्का किती प्रभावी ठरतो, यावरच उमेदवारांचे राजकीय भवितव्य अवलंबून आहे. नगरसेवकपदाच्या निवडणुकीतही राजकीय समीकरणे गुंतागुंतीची ठरली आहेत. संगमनेर सेवा समिती, भाजप-शिवसेना महायुती यांच्यासह राज्याच्या राजकारणात महायुतीचा घटकपक्ष असलेला राष्ट्रवादी काँग्रेस (अजित पवार गट), स्वतंत्रपणे आपले अस्तित्व दाखवण्याचा प्रयत्न करत आहे. त्यामुळे काही प्रभागांत तिरंगी, काही ठिकाणी चौरंगी, तर काही ठिकाणी बहुरंगी लढती पाहायला मिळाल्या. यात मतांचे विभाजन कोणाच्या फायद्याचे आणि कोणाच्या तोट्याचे ठरणार, याबाबत तर्क-वितर्क लढविले जात आहेत.
नगरपरिषदेची रणधुमाळी संपल्यानंतर अवघ्या एक ते दीड महिन्यातच पंचायत समिती आणि जिल्हा परिषदेची निवडणूक होणार आहे. त्यामुळे नगरपालिकेचा निकाल त्या निवडणुकीसाठी उपांत्य सामना मानला जात आहे. येथे मिळणारी आघाडी किंवा पिछाडी राजकीय दिशा ठरवणारी ठरू शकते. त्यामुळे भविष्यातील संगमनेरचा खरा किंगमेकर कोण ठरणार, हे या निवडणुकीतून स्पष्ट होईल.
प्रभाग एक, दोन, तीन-ब साठी विरोधी उमेदवारांनी न्यायालयात याचिका दाखल केली होती. त्यामुळे तेथील स्थगित केलेले मतदान आज झाले आहे आहे. शिवसेनेचे अभिजित ऊर्फ मुन्ना पुंड, माजी नगराध्यक्ष दिलीप पुंड, इंदिरा नामन, अर्चना दिघे, तसेच अपक्ष दोन उमेदवाराचे राजकीय भवितव्य कसे असेल हे उद्या समजेल
