संगमनेर शहरातील कुरण रोड परिसरातील ५० वर्षीय राम अवतार या बेकरी चालकाने जमिनीच्या व्यवहारातून झालेल्या कथित फसवणुकीला कंटाळून रायतेवाडी परिसरात झाडाला गळफास घेऊन आत्महत्या केल्याची धक्कादायक घटना समोर आली आहे. या घटनेमुळे संगमनेर शहरात खळबळ उडाली आहे.
मिळालेल्या माहितीनुसार, राम अवतार हे कुरण रोड परिसरात बेकरी व्यवसाय चालवत होते. जमिनीच्या व्यवहारातून आपली फसवणूक झाल्याचा आरोप त्यांनी केला होता. आत्महत्या करण्यापूर्वी त्यांनी काही व्हिडिओ तयार केल्याची माहिती समोर आली असून, या व्हिडिओमध्ये त्यांनी संबंधित जमिनीच्या व्यवहारातील काही व्यक्तींची नावे घेतल्याचे सांगितले जात आहे.
राम अवतार यांचा हा व्हिडिओ सोशल मीडियावर व्हायरल झाल्यानंतर त्यांच्या नातेवाईकांसह संगमनेर शहरातील काही सामाजिक कार्यकर्त्यांनी त्यांचा शोध घेण्याचा प्रयत्न केला. मात्र, त्यांचा ठावठिकाणा मिळू शकला नाही. अखेर सकाळच्या सुमारास शहरालगतच्या परिसरात एका झाडाला त्यांचा मृतदेह आढळून आला.
या घटनेनंतर जमिनीच्या व्यवहारातील फसवणुकीचा आरोप, संबंधित व्यक्तींची भूमिका आणि राम अवतार यांनी आत्महत्येपूर्वी केलेल्या व्हिडिओमधील दावे याबाबत आता पोलिस तपास महत्त्वाचा ठरणार आहे.
या घटनेमुळे संगमनेरमध्ये जमिनीच्या व्यवहारात मध्यस्थी करणारे दलाल, खरेदी-विक्रीतील पारदर्शकता आणि नागरिकांची फसवणूक रोखण्यासाठी आवश्यक असलेल्या उपाययोजनांबाबत पुन्हा एकदा प्रश्न उपस्थित झाले आहेत.
