शिवजयंती उत्सवावरून काँग्रेस-शिवसेनेत वाद By Admin 2025-03-10

दैनिक आनंद News (प्रतिनिधी)

काँग्रेसकडून मंदिर तर शिवसेनेकडून किल्ला उभारण्याच्या तयारीवरून बस स्थानकावर तणाव .

संगमनेर - तिथीनुसार शिवजयंती उत्सवाची बस स्थानकावर तयारी रविवारी(दि९) सुरू होती. याच वेळी या ठिकाणी दुसऱ्या गटांनी देखावा साजरा करण्याच भूमिका घेतल्याने तणाव निर्माण झाला होता. काँग्रेस आणि शिवसेना कार्यकर्ते, पदाधिकाऱ्यांमध्ये यावेळी रात्री वाद निर्माण झाला.यामुळे मोठा पोलीस बंदोबस्त घटनास्थळी दाखल झाला. रात्री उशिरा यावर तोडगा निघू शकला नाही.

या याबाबत पोलिसांकडून मिळालेली माहिती अशी की, तिथीनुसार संगमनेरात शिवजयंती साजरी करण्यात येणार असून त्या दृष्टीने तयारी सुरू करण्यात आहे‌ काँग्रेसच्या वतीने बस स्थानकावर मंदिर उभारण्यात येणार आहे. त्याचे उद्घाटन रविवारी आमदार सत्यजित तांबे यांचे हस्ते झाले. सायंकाळच्या वेळेस याचे काम सुरू असतानाच शिवसेनेकडून याच ठिकाणी किल्ला उभारण्याचा आग्रह धरण्यात आला. दोन्ही बाजूचे कार्यकर्ते जमा झाल्याने घोषणाबाजी करण्यात आली तणाव निर्माण झाला. याची माहिती पोलिसांना मिळताच पोलीस हे घटनास्थळी दाखल झाले. उपअधीक्षक डॉ. कुणाल सोनवणे, तालुका पोलीस ठाण्याचे निरीक्षक देविदास ढुमणे, संगमनेर शहर पोलीस ठाण्याचे सहाय्यक पोलीस निरीक्षक विश्वास भान्सी यांच्यासह मोठा पोलीस पोलीस बंद बंद करण्यात आला. संगमनेर नगर परिषदेचे मुख्याधिकारी रामदास कोकरे आले. पोलिसांसमोरच काँग्रेस आणि शिवसेनेच्या दोन्ही गटात उत्सवावरून वाद सुरू होते. रात्री उशिरापर्यंत बस स्थानकावर पोलिसांसह दोन्ही गट ठाण मांडून बसले होते.

रविवारी पोलिसांनी प्रवेशद्वाराजवळ पोलीस व्हॅन उभी करून बंदोबस्ताची तयारी केली होती. दरम्यान संध्याकाळी बस स्थानकाच्या प्रवेशद्वारा शेजारी काँग्रेसकडून भव्य शिवमंदिर उभारण्याची तयारी सुरू करण्यात आली. त्यामुळे तेथे आलेल्या शिवसेनेच्या पदाधिकारी, शिवसैनिकांनी तेथेच किल्ला बांधणीची तयारी सुरू केली. काँग्रेस व शिवसेनेकडून पोलिसांसमोर एकमेकांच्या कृतीला विरोध करण्यात आल्याने दोन्ही गटात वाद वाढत चालला होता. 

शिवसेनेकडून काही दिवसांपूर्वीच शिवजयंती उत्सव मोठ्या जल्लोषात साजरा करण्यात आला होता. त्यानंतर यावर्षी शिवजयंती उत्सवात प्रथमच काँग्रेसने सहभाग घेत भव्य शिवमंदिर उभारण्याची तयारी सुरू केली होती. या सर्व वादात शिवजयंती उत्सवातील प्रमुख दावेदार असलेली शिवसेना (उद्धव बाळासाहेब ठाकरे) अलिप्त दिसून आली. ठाकरेंच्या शिवसेनेकडून पारंपारिक मिरवणूक काढली जात असते. संगमनेर मध्ये शिवजयंती उत्सवाला प्रथमतःच राजकीय वळण लागले. दरम्यान काँग्रेस आणि शिवसेना आपापल्या भूमिकांवर ठाम असल्याने संगमनेरचे पोलीस याप्रकरणी काय भूमिका घेतात, या वादात आता काय निर्णय लागतो याकडे लक्ष लागून राहिले.

कोट -  एकाच ठिकाणी बस स्थानकावर शिवजयंती साजरी करण्याचा आग्रह दोन्ही गटाने धरला होता. एका गटाला किल्ल्याचा देखावा तर दुसऱ्याला शिवाजी महाराजांचे मंदिराचा देखावा उभारायचा होता. यावरून रविवारी रात्री बस स्थानकावर दोन्ही गटाचे कार्यकर्ते आक्रमक झाले होते. बराच वेळ वाद-विवाद सुरू होता. मात्र पोलिस परिस्थितीवर लक्ष ठेवून होते. अखेर यावर सोमवारी होणाऱ्या बैठकीत निर्णय  येणार आहे.

डॉ.कुणाल सोनवणे पोलीस उपअधीक्षक