दैनिक आनंद News (प्रतिनिधी)
गुटखा माफियांना मकोका लावणार; कायद्यात सुधारणा करणार, मुख्यमंत्री फडणवीस यांची विधानसभेत घोषणा
नागपूर. गुटखा विक्रेत्यांना मकोका लावण्याचा प्रस्ताव आम्ही तयार केला होता, त्यावर विधी व न्याय विभागाच्या मतानुसार धमकी व इजा असे गुन्हा असल्याशिवाय मकोका लावता येत नाही. त्यामुळे कायद्यात बदल करून दुरुस्ती करण्यात येणार असल्याची माहिती मुख्यमंत्री देवेंद्र फडणवीस यांनी आज विधानसभेत दिली.
राज्यात गुटखाबंदी असतानाही नवी मुंबई, अहिल्यानगर, जालना, अकोला, नाशिक, चंद्रपूर, सोलापूर, बुलढाणा, नागपूर, यवतमाळ आदी जिह्यांत मोठय़ा प्रमाणात गुटखा, पानमसाला, मावा आणि चरस-गांजाची विक्री सुरू आहे. गुजरात, राजस्थान आदी राज्यांतून भाजीपाला, तेल, किराणा मालाची वाहतूक करणारे कंटेनर, ट्रक, टेंपोच्या माध्यमातून गुटख्याचा साठा विक्रेत्यांपर्यंत पोहचविला जात आहे. गुन्हे शाखेच्या अंमली पदार्थ विरोधी पथकाच्या कारवाईतून उघड झाले आहे. या अवैध व्यवसायांवर कायमस्वरूपी बंदी आणण्याबाबत प्रशांत ठाकूर यांनी तारांकित प्रश्न उपस्थित केला होता.
